Il salvament

L’aura è sa meglierada glindesdi, ils 7 d’avrigl 1975. Uschia han var 60 persunas pudì gidar da tschertgar las 10 persunas ch’eran anc adina sparidas ad Acla.

Gidanters cun palas chavan ina rusna en la navi per chattar ils sparids. Bild in Lightbox öffnen.

Legenda da maletgs: Gidanters tschertgan ils sparids sut la lavina. Archiv vischnanca Medel/Lucmagn

Enturn las 7.30 èn ils var 60 gidanters arrivads cun il helicopter. Il chaun da lavinas ha gia suenter intginas minutas dà is. Pliras uras han ils gidanters chavà cun grondas stentas tranter naiv, crappa, mobiglias e laina da la chasa, fin ch’els han pudì liberar ils uffants ord la lavina. Quai suenter passa 20 uras en il fraid e stgir da la lavina.

«  L'emprim avain nus udì ils helicopters. »

Constatin Venzin (10 onns)

Urs Flepp, in dals uffants, han ins mo pli pudì salvar mort. Suenter ch’ils uffants èn stads salvads, mancavan anc ils 3 creschids ch’eran en cuschina, cura che la lavina è vegnida. Entant che Battesta Flepp e Maurus Venzin èn vegnids per la vita entras il mirs da la cuschina ch’èn sbalunads, ha Ursula Venzin - ch’era gist sin isch cuschina - survivì. Ella è vegnida salvada sco ultima or da la lavina.

Ina trista bilantscha

Sper las 3 persunas che han pers la vita en la lavina, èn era 24 tocs muvel grond e 63 tocs muvel manidel daventads unfrendas da la lavina. En il vitg è vegnì destruì la chaplutta, 6 chasas, 8 clavads, in mulin ed ina garascha. Da l’autra vart a Punt è vegnì destruì entras las lavinas ina baracca da militar, 3 clavads, 2 garaschas, ina baracca da construcziun, ina garascha dal militar e la resgia a Fontauna. Latiers vegnan 24 autos ed auters vehichels.