La dumengia – il di da la catastrofa

La segunda lavina vegn la notg. La terza che chaschuna la catastrofa vegn vers mezdi.

Vista vers Fuorns ed Acla. Cun l'indicaziun nua che las lavinas èn ruttas ora. Bild in Lightbox öffnen.

Legenda da maletgs: Survista da las lavinas ad Acla: 1) Ruttadira da la lavina da la Muota ch’è vegnida duas giadas; 2) Lavina da la Puz... Archiv vischnanca Medel/Lucmagn

La notg enturn 01:00 vegn la segunda lavina. Quella ha destruì garaschas e 2 clavads a Punt (la part dad Acla ch’è da la vart dretga da la via principala) . Ella ha medemamain destruì il guaud a Punt ed è vegnida prest fin tar il Rain da Medel.

Durant la notg da la sonda sin dumengia hai puspè dà var 80 cm naiv nova. Battesta Flepp organisescha l’evacuaziun dals abitants. Pervi da l’aura n’èsi dentant betg pussaivel da sgular, ed uschia ston ils abitants star vinavant ad Acla.

Quels fan il meglier ordlonder. Ils purs che han anc lur animals rugaleschan quests, ils auters ch’han per part gia pers quels en las lavinas gidan.

La terza lavina

Las 10:30 vegn la terza lavina. I vegn descrit che questa saja rutta ora sin l’entira lunghezza da la Muota, Plattas da Punt e Dutg da Rosas. Entras las duas lavinas ch’èn gia vegnidas avant a val era tut guliv ed il guaud gia davent, uschia che la las massas da navi giganticas èn sa derschidas directamain direcziun Acla. Il crest cun la chaplutta ha curt franà la lavina. Las massas da naiv èn dentant s’auzadas ed idas directamain en il vitg.

11 persunas èn sparidas

Sulettamain 2 da las 10 chasas n’èn betg vegnidas donnegiadas. La chasa da las famiglias Bearth e Giossi sisum il vitg, e la chasa da Sep Martin Venzin. Ils vischins ston constatar che 11 persunas èn sparidas. Uschia Maurus Venzin cun sia dunna Ursula ed ils quatter uffants, Edith, Antonia, Victoria e Constantin, Battesta Flepp cun ses uffants Urs, Patricia e René e Conradin Venzin. Conradin Venzin ha pudì sa deliberar sez or da l'uigl. Ils auters han ils vischins immediat cumenzà a tschertgar.

«  Nus avain chavà l’entir suentermezdi. Quest di avain nus gì nagin success. »

Giusep Bearth