Siglir tar il cuntegn

Header

cuntegn

Allegra Vorarlberg… Cifras da record per il turissem d’enviern 15/16 en il Vorarlberg

L’enviern passà ha il Vorarlberg pudì nudar uschè blers giasts sco anc mai. En cumparaziun cun la stagiun d’enviern avant in onn è la cifra da giasts s’augmentada per 3,1%. Era tar las pernottaziuns hai dà in svilup positiv.

La statistica da Vorarlberg Tourismus mussa per las pernottaziuns dal november 2015 enfin il favrer 2016 in record da giasts ed il segund-meglier resultat da las pernottaziuns durant quest temp. E durant il favrer èn questas cifras anc s'augmentadas.

audio
Turissem – Tge fan els meglier che nus?
ord RTR Audio dals 04.05.2016.
laschar ir. Durada: 5 minutas 22 Secundas.

Be paucs austriacs fan vacanzas en il Montafon

Sch’ins cumpareglia las cifras da las pernottaziuns da l’hotel Zimba en il Montafon dat en egl che 40% dals giasts èn svizzers. L’atgna glieud manca dentant. Sin 100 giasts èn mo 6 da l’Austria.

Tge fan ils Vorarlbergers meglier ch’ils Grischuns ?

Forsa fetschia il Montafon ina meglra reclama che Grischun Turissem, manegia Heike Ladurner, hoteliera a Schruns en il Montafon. Ils capricorns Gian e Giachen sajan cult, ma nagin che sappia che quests dus animals fetschian reclama per il Grischun. La reclama dal Montafon è focusada dapli sin ils differents products en favur dal giast.

In auter secret per il success è la collavuraziun cun l’agricultura. Il giast pretendia en ina regiun muntagnarda products regiunals e sche la collavuraziun funcziuna dettia quai ina meglra reputaziun anoravers. La fin finala profiteschia il pur, il hotelier ed oravant tut il giast.

Heike e Peter Ladurner avant lur hotel Zimba a Schruns.
Legenda: Heike e Peter Ladurner avant lur hotel Zimba a Schruns. RTR/ORF/Ch. Suter

Terzo saja impurtant, punctuescha Heike Ladurner, d’investir mintga rap en il hotel. Dapi prest 20 onns maina ella in hotel da famiglia a Schruns. L’hotel ha 3 stailas ed avant 13 onns hai dà la davos gronda midada cun construir in bogn cuvert e saunas. Mintg’onn datti ina pitschna midada u ina sanaziun vid la chasa. Quest onn vegn engrondida la sala da mangiar. Actualmain dumbra l’hotel Zimba a Schruns 124 letgs.

La tradiziun da famiglia cuntinuescha en l’hotel Zimba. En intgins onns vegn lur fegl Christian a surprender il manaschi da famiglia. Quai fetschia tut pli lev, di Heike Ladurner; «sch’ins na sa betg per tgi ch’ins investescha ils daners, vegni grev».

sch’ins na sa betg per tgi ch’ins investescha ils daners vegni grev
Autur: Heike Ladurner Hoteliera

Artitgels legids il pli savens