Daniel Devich maina la fatschenta da famiglia en quarta generaziun. El ha fatg l’emprendissadi mercantil, l’artisanadi dals chalzers da lain ha el emprendì da ses bab. La firma producescha radund 30'000 pèra chalzers ad onn e las curunas en stizun èn emplenidas cun chalzers da tutta sort.
Dal motociclist enfin il plevon
Ils chalzers da lain surtratgs cun tgirom u pail vegnan purtads da zunt differentas persunas. Uschia ha la firma Devich era gia fatg chalzers per motociclists passiunads cun il logo da «Harley Davidson» en il tgirom. Ed en il Bregenzerwald datti in plevon che fa messa cun ils «Hölzlers». Quests sajan dentant decents, punctuescha il manader da la firma.
Per las dunnas in stival chaud
Dapli fantasia hai duvrà da persvader las dunnas da purtar ils chalzers voluminus da lain. Ma lura ha la firma Devich creà stivals sin basa dal «Hölzler».
Nagina dunna less pes fraids
Quests stivals cun sola da lain e pail per part exotic, stgaudan fitg bain ils pes e Daniel Devich è persvadì che nagina dunna ha gugent pes fraids. Ed uschia èn era ils stivals daventads in hit.