La Polizia chantunala dal Grischun surpiglia incumbensas en ils secturs da la segirezza publica, dal traffic e da l'administraziun che la polizia communala da Domat fascheva fin ussa sezza. Las vischnancas èn da principi responsablas per la segirezza publica sin lur territori. Era tar lur responsabladad tutga da guardar p. ex. che la lescha da rument u scumonds da fimar vegnan respectads. Questas incumbensas pon las vischnancas surdar en furma d'in contract a la Polizia chantunala. Lavurs sco il servetsch da novitads/servetsch secret u era mesiras repressivas, dastga tenor la lescha da polizia da principi be la Polizia chantunala exequir.
Ord vista dal chantun saja il contract cun la vischnanca da Domat in signal positiv per la buna collavuraziun tranter la Polizia chantunala e la vischnanca. In signal positiv saja quai era per la preschientscha da la Polizia chantunala en l'entir chantun.
