L'artista Angelika Kauffmann è represchentada anc meglier en il Museum d'art dal Grischun en il futur. Il museum survegn 17 ovras dad Angelika Kauffmann sco donaziun. Cun quai saja pussaivel da schlargiar in accent da la collecziun, scriva il museum.
La donaziun vegn da Johannes Fulda da Maiavilla ch'ha rimnà sur decennis ina gruppa extraordinaria dad ovras da Kauffmann. Questa ha'l ussa mess a disposiziun al Museum d'art dal Grischun, ed uschia era a la publicitad.
Angelika Kauffmann n'è betg mo il cumenzament da la collecziun d'art grischuna, ma è era lingia directiva per nossa collecziun grischuna.
La dunna naschida a Cuira vala tenor il Museum d'art dal Grischun sco la pli impurtanta artista europeica da ses temp. Ella saja ozendi fitg respectada sco pictura tranter il classicissem e la romantica.
Davent dal favrer preschenta il museum las ovras d'Angelika Kauffmann.