Siglir tar il cuntegn

Header

audio
Donaziuns d'organs duain daventar pli simplas
Or da Actualitad dals 23.02.2022.
laschar ir. Durada: 4 minutas 9 Secundas.
cuntegn

Donaziuns d'organs Cussegl federal lantscha cumbat per simplifitgar donaziuns

Tgi che na vul suenter la mort betg donar ses organs, duai en l'avegnir stuair documentar quai explicitamain ed a scrit. Parents duain però vinavant avair la pussaivladad da dir Na ad ina donaziun d’organs. Mardi ha Cusseglier federal Alain Berset lantschà il cumbat da votaziun.

Per persunas malsaunas creschia la schanza da retschaiver in organ. Sche ni la veglia saja documentada ni parents possian vegnir dumandads, na vegnian ils organs betg donads. Cunter la fatschenta ha in comité independent fatg il referendum. Uschia decida il suveran a l’urna, quai ils 15 da matg.

audio
Alain Berset: Ina maioritad s'exprima a moda positiva envers la donaziun d'organs
ord RTR Audio dals 22.02.2022.
laschar ir. Durada: 20 Secundas.

Register duai gidar

Per documentar e chattar en cas d'urgenza a moda simpla la veglia d'ina persuna duai vegnir stgaffì in nov register. Là duai esser pussaivel d'inditgar tant in Gea sco er in Na a donaziuns u er da restrenscher quellas sin tscherts organs. Tar in Gea dal pievel ils 15 da matg vegnia il register actual da Swisstransplant mess si da nov cun ina cunvegna da prestaziun, survigilanza e tenor las reglas da protecziun da datas da la Confederaziun. Plinavant saja planisada ina gronda campagna d'infurmaziun per la populaziun.

Cuntraproposta indirecta tar iniziativa dal pievel

La proposta che vegn uss a l'urna è ina reacziun da Cussegl federal e parlament sin l'iniziativa dal pievel «Promover la donaziun d'organs – Salvar vitas». Quella era reussida e vegnida inoltrada il mars 2019 e pretenda medemamain ch'ins stoppia dir explicitamain Na sch'ins na vul betg donar ils organs. Quai però senza reglar ils dretgs dals parents. Perquai han tant il Cussegl federal ed il parlament refusà ella.

Suenter ch'il parlament ha dà ses consentiment a la cuntraproposta dal Cussegl federal, han ils iniziants decidì da retrair lur iniziativa l'october 2021 sut la cundiziun che la cuntraproposta giaja en vigur.

RTR novitads 15:00

Artitgels legids il pli savens

Scrollar a sanestra Scrollar a dretga