Siglir tar il cuntegn

Header

cuntegn

Dretgira chantunala Sentenzia pli miaivla per manischunz da l'accident mortal a Domat

La dretgira chantunala mussa bainvulientscha per il manischunz ch'ha chaschunà avant quatter onns a Domat in accident, nua ch'ina dunna da 27 onns era morta. El na sto tuttina betg ir sis onns en praschun.

La dretgira regiunala Plaun aveva sentenzià l'um a sis onns praschun nuncundiziunà. Quai pervia dad in accident dals 18 da schaner 2017. La damaun baud aveva el vulì passar in auto ed in camiun. El è collidà cun ina dunna giuvna che vegniva encunter cun in töf. La giuvna è vegnida sdermanada davent 43 meters ed e morta. In'analisa dal sang tar il manischunz ha mussà ina concentraziun da la substanza THC da 4,5 micrograms per liter. Il cunfin fiss 1,5 micrograms per liter.

L'um ha fatg recurs cunter questa decisiun. La dretgira chantunala ha sbassà la sentenzia sin 34 mais. 17 da quels sto l'um ir en praschun. Tenor la dretgira chantunala na saja betg cler ch'il automobilist ha agì cun intenziun e sch'il THC saja stà il sulet motiv per l'accident u sch'i haja anc dà auters facturs.

L'um sto era pajar ina multa da 300 francs, in chasti pecuniar cundiziunà da 12'600 francs e surpigliar ils custs da procedura.
La sentenzia po anc vegnir tratga vinavant.

audio
Per tadlar curt e cumpact
aus RTR Audio vom 29.10.2021.
abspielen. Laufzeit 1 minuta 12 Sekunden.

RTR novitads 12:00

Artitgels legids il pli savens

Scrollar a sanestra Scrollar a dretga