En ina dispita d'ierta avevan ils conderschaders decidì il 2019 ch'il derschader Peter Schnyder n'haja nagina funcziun pli en questa dumonda e na dastgia betg avair contact cun ina part dals represchentants da la dispita d'ierta. Schnyder ha sin quai recurrì tar il Tribunal federal.
Tribunal federal renviescha il cas per tractar anc ina giada
Il cas è però in zic pli cumplex: Losanna ha renvià la decisiun dals collegas da Schnyder (quella da dispensar el da la procedura) ch'avessan lura anc ina giada stuì tractar questa chaussa. Sin quai ha Peter Schnyder fatg ina dumonda da recusaziun – cun auters pleds pretendì che ses collegas na duain betg anc ina giada pudair decider, sch'el dastgia far part a la procedura u betg. Els sajan memia cumpigliads e partischants, uschia Schnyder. Sin quai ha la Dretgira chantunala delegà questa decisiun a la Dretgira administrativa dal chantun Grischun che ha sustegnì la decisiun oriunda da la Dretgira chantunala.
Tribunal federal cassescha sentenzia da tribunal administrativ
E qua dat il Tribunal federal la segunda giada raschun a Peter Schnyder: La dretgira administrativa haja simplamein refusà sia dumonda da recusaziun – e quai avant ch'el ha gì la pussaivladad da prender posiziun. Tenor Losanna tutga quai dentant tar ina procedura faira. La dertgira administrativa sto uss anc ina giada tractar la causa ed il chantun sto pajar a Peter Schnyder 3'000 francs sco indemnisaziun per il process tar la dretgira federala.
