Radund 70 mattas han survegnì gievgia in’invista en la lavur politica en il Grischun. L’avantmezdi han ellas lavurà en diversas cumissiuns ed han là preparà diversas moziuns. Questas èn lura vegnidas discutadas en las debattas il suentermezdi en la sala dal Cussegl grond. Sco tar las grondas ed ils gronds, è vegni debattà e lura a la fin votà. E tut quai sut la controlla da la presidenta dal Cussegl grond Aita Zanetti.
Jau less ch’ellas van a chasa cun in satgados plain novas impressiuns.
Ellas han deliberà petiziuns davart la midada dal clima, gender e sexissem, la furmaziun e la digitalisaziun, sco er davart l'avegnir en il Grischun. Silsuenter han ellas surdà las petiziuns al president da la regenza Mario Cavigelli. Tut en tut han las scolaras da l'emprima fin terza classa dal stgalim superiur da tut il Grischun deliberà sis propostas.
Las giuvnas han laschà motivar per la politica
Per las duas giuvnas Nina Cavelti da la Surselva e Mia Portmann da l’Engiadina èsi stà in di fitg interessant. Enfin uss avevan ellas pauc da far cun la politica. Il di dad oz haja dentant motivà ellas da s’interessar en futur pli fitg per la politica.
Quai ha dà a mai la motivaziun da forsa era ina giada s’engaschar en la politica.
