Siglir tar il cuntegn

Header

audio
Economia GR: Firmas bain cuntentas, vesan però anc potenzial
Or da Sport ed actualitad dals 10.04.2022.
laschar ir. Durada: 2 minutas 58 Secundas.
cuntegn

Economia grischuna Dus terz da las firmas han fadia da chattar persunal adattà

Dus terzs da las firmas dumandadas hajan fadia da chattar persunal adattà – nundependent da la branscha. Quai mussa ina retschertga da l'organisaziun tetgala d'economia dal Grischun.

Tar las pli grondas sfidas per firmas en il Grischun tutgan la birocrazia e la mancanza da persunal qualifitgà. Quai stat scrit en in studi che l'Organisaziun tetgala d'economia dal Grischun ha fatg tar 500 commembras ord tut las branschas. Duas terzas da las firmas dumandadas hajan fadia da chattar persunal adattà – e quai na saja betg dependent da la branscha. La pli gronda mancanza dettia tar professiuns spezialisadas.

Er en futur vegnia la situaziun da persunal ad esser difficila. Ina buna part dals lavurants vegnian pensiunads ils proxims 10 onns, pli paucs lavurants entran dentant sin il martgà. Er il svilup demografic – dapli persunas chattan ina plazza da lavur giu la Bassa – saja ina sfida.

Cundiziun da rom «mediocher» enfin «bun»

Las cundiziuns da rom en Grischun sajan dentant per gronda part en urden. En general stiman firmas grischunas las cundiziuns economicas dal Grischun sco «mediocher» fin «bun». Mo ina pitschna part stima la situaziun sco «fitg buna» u «fitg nauscha». Davart il svilup da las cundiziuns sa mussa in maletg divers. Mintgamai in terz dals dumandads èn da l'opiniun che la situaziun saja constanta, haja sa meglierada u haja sa pegiurada.

Organisaziun tetgala d'economia dal Grischun

Avrir la box Serrar la box

Organisaziun tetgala d'economia dal Grischun (DWGR) represchenta tranter auter l'Uniun grischuna d'artisanadi e mastergn, la Chombra da commerzi e federaziun dals patruns dal Grischun sco er HotellerieSuisse Grischun. Ensemen represchenta l'organisaziun tetgala varga 7'000 firmas.

L'uniun s'engascha per cundiziuns da rom bunas per l'economia e per libertad sin il martgà cun paucas restricziuns.

Ils resultats sajan per l'Organisaziun tetgala in cler signal envers la politica. I na dettia naginas soluziuns simplas. Sch'i va per regulaziuns, dumondas da bajegiar u furmaziun e perfecziunament professiunal vesian 60% dals participants potenzial d'agir. Il Grischun duai surtut sa posiziunar pli ferm sco chantun attractiv per lavur ed abitar.

Situaziun avant la pandemia ed uss

Plinavant ha la retschertga fatg dumondas davart la situaziun da la fatschenta avant e suenter corona. Per la gronda part (44%) n'haja la situaziun betg sa midada. Tar 29% saja la situaziun mendra, tar 24% perfin meglra ch'avant la pandemia. La situaziun economica saja pia buna, uschè l'organisaziun tetgala. Las vistas en il futur sajan per part dentant malsegiras. Las pli grondas temas sajan la mancanza da persunal qualifitgà e sfidas cun furniziuns da material.




Adattà al tema

La mancanza da mastergnants e mastergnantas fa gia oz problems a diversas branschas. La «Marella» ha tematisà quella sfida.

audio
Blera lavur – dentant memia paucs mastergnants!
ord Marella dals 13.02.2022.
laschar ir. Durada: 46 minutas 18 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga