Siglir tar il cuntegn

Header

cuntegn

Elecziuns Cussegl grond Partidas da pol profiteschan

En il Cussegl grond vegnan las forzas repartidas da nov – cunzunt pervia dal nov sistem electoral. Quai mussa la retschertga che l'institut Sotomo ha fatg per incumbensa da RTR e la Somedia.

La Partida populara è tenor la retschertga da Sotomo la gronda victura e triplass sia fermezza en il Cussegl grond. Quai muntass che la PPS fiss ensemen cun l'Allianza dal Center la gronda partida en il parlament.

La PPS è quella partida ch'è stada enfin uss massivamain sutrepreschentada, perquai vegn ella a crescher.
Autur: Michael Hermann Politolog da l'institut Sotomo
audio
Cussegl grond cun grondas midadas – Michael Hermann analisescha
ord RTR Audio dals 13.04.2022. Bild: RTR
laschar ir. Durada: 2 minutas 42 Secundas.

Era la Partida socialdecmocratica ed ils Verds paran da profitar da la midada da sistem dal maiorz sin il proporz: Tenor la retschertga pudess quest bloc crescher per circa in terz. La PS ch'è cunzunt ferma en regiuns urbanas n'ha tenor Michael Hermann dentant betg uschè grond potenzial da crescher sco la PPS. Era ils Verdliberals pudessan profitar – cunquai che lezs n'han dentant betg en tut ils 39 circuls candidatas e candidats saja betg pussaivel da recaltgar tants sezs, di il politolog Michael Hermann. Insumma, ils spustaments che la retschertga prognostitgescha en il Cussegl grond sajan da prender cun precauziun. Ma las cifras mussian ch'il proporz dubel vegnia ad avair in grond effect.

Fermezzas en il Cussegl grond.
Legenda: RTR

Allianza dal Center e liberaldemocrats ston laschar plimas

Perdidras en il Cussegl grond èn las duas fracziuns grondas, la PLD e l'Allianza dal Center. Tenor la retschertga perda l'Allianza dal Center passa in terz – ils liberaldemocrats bunamain la mesadad. Per ils presidents da partida da la PLD e l'Allianza dal Center n'èsi betg ina surpraisa ch'il proporz fa pli grev da defender ils sezs: Kevin Brunold (AdC) è dentant persvadì ch'els na vegnan betg a perder tant. E Bruno Claus (PLD) po s'imaginar ch'i dat ina polarisaziun en il parlament u forsa er che tschertas partidas giogan ina rolla decisiva.

audio
Bruno Claus e Kevin Brunold speran che lur partidas na perdan betg tant
ord RTR Audio dals 13.04.2022.
laschar ir. Durada: 2 minutas 22 Secundas.

Retschertga da Sotomo

Avrir la box Serrar la box

La retschertga è vegnida fatga tranter ils 28 da mars enfin ils 4 d'avrigl 2022 e quai via las paginas d'internet dad RTR e Somedia e cun in panel online da Sotomo. En tut èn vegnidas dumandadas 1'888 persunas.

Damai che la candidatura da Hans Vetsch è vegnida enconuschenta suenter la retschertga, ils 11 d'avrigl, n'è el betg resguardà.

La quota da malsegirtad munta a +/-2,6%.

Dossier online

Avrir la box Serrar la box
Dossier online

Sin in clic tut davart las elecziuns grischunas.

RTR actualitad 17:30

Artitgels legids il pli savens

Scrollar a sanestra Scrollar a dretga