Siglir tar il cuntegn

Header

audio
Quant realistic è ina candidatura independenta da dunnas?
Or da Actualitad dals 20.10.2021.
abspielen. Laufzeit 4 minutas 30 Sekunden.
cuntegn

Elecziuns da regenza Co fissi cun ina candidata selvadia?

Martin Bühler, Roman Hug, Marcus Caduff, Jon Domenic Parolini, Peter Peyer – quai èn ils candidats per las elecziuns da la regenza 2022. I manca enfin uss ina dunna. Mo co chattar quella? RTR ha analisà in'idea selvadia.

Quai è l'idea: Dunnas da tut las partidas s'uneschan per chattar ina candidata selvadia che pudess daventar cussegliera guvernativa. La situaziun è numnadamain quella: Enfin uss èn be umens vegnids nominads per ir en la cursa per in sez en la regenza. Fiss quai insumma pussaivel da far uschia insatge? Avant quatter onns ha gea er Linard Bardill candidà spontanamain selvadi, pertge lura betg ina dunna?

Las retschertgas dad RTR en ils sulers dal Cussegl grond e cun la centrala da dunnas mussan: Candidar selvadi senza ina partida en il dies è en il Grischun quasi betg pussaivel. Betg be che quai fiss schon pli grev da far cumbat electoral, i na fiss quasi er betg pussaivel da lavurar sco cussegliera guvernativa senza il sustegn da la partida.

Cunter la partida?

Pia duvrass quai dunnas che èn gia en partidas. Dentant sche las partidas han gia nominà lur candidats uffizials sco la PLD e la PPS, na pon las dunnas strusch pli daventar candidatas per la gruppa da dunnas. Uschiglio concurrenzassan ellas il candidat uffizial e faschessan cunter la decisiun da la partida. E quai na plaschess probablamain betg a la partida e la dumonda fiss er: Vul ina politicra far quai?

Pia tuttina senza partida?

Ina idea fiss forsa er, da per exempel candidar cun ina dunna da l'administraziun chantunala? Là dess quai franc pliras dunnas cumpetentas, dentant Cathrin Räber da la centrala da dunnas manegia er, che quellas duvrassan ina partida sco sustegn. Ils ultims candidats che han empruvà da far il pass da l'administraziun en la regenza eran Heinz Brand e Walter Schlegel da la PPS. Tar els n'è quai betg grategia. Uss vegn la PLD cun in candidat or da l'administraziun, Martin Bühler.

Per vegnir enavos sin la dumonda oriunda: Candidar selvadi cun ina dunna fiss da principi pussaivel, dentant ils obstachels sin la via per lura propi gudagnar fissan numerus.

RTR actualitad 07:00

Artitgels legids il pli savens

Scrollar a sanestra Scrollar a dretga