Siglir tar il cuntegn

Elecziuns Frantscha 2017 11 candidats uffizials per il presidi franzos

Per las elecziuns dal nov president da l’avrigl èn 11 candidats admess. Il cussegl constituziunal franzos ha confermà formalmain lur candidatura. Fin venderdi han ils candidats stuì rimnar 500 suttascripziuns da represchentants dal pievel elegids. Ussa na pon nagins novs candidats s'annunziar.

Purtret da caricaturas dals trais candidats.
Legenda: Ils trais candidats cun las meglieras schanzas: da sanester, Marine Le Pen, François Fillon ed Emanuel Macron. Keystone

Sco candidats cun las pli grondas schanzas valan la presidenta da la partida dretga, Marine Le Pen e l'anteriur minister d'economia Emanuel Macron che candidescha per la partida ch'el ha fundà, En Marche (enavant).

Sin il terz plaz è tenor retschertgas il mument l'anteriur primminister e candidat dals republicans, François Fillon. Il candidat dals socialists, che regian per il mument, Benoit Hamon è cun gronda distanza sin il quart plaz e n'ha probablamain naginas schanzas da gudagnar l'elecziun. Medem era cun ils ulteriurs candidats.

Sche Macron cuntanscha la segunda runda haja el bunas schanzas da gudagnar cunter Le Pen. Prognosas prevesan che Macron duai dumagnar Le Pen cun 62% cunter 38% da las vuschs.

Fillon ha ditg valì sco favurit per il presidi. Dentant suenter ch'i è vegnì enconuschent ch'el duai avair fatschentà sia dunna sin donn e cust dal stadi, senza che quella haja propa lavurà ha el pers bleras vuschs. En ina retschertga hajan perfin 75% dals participants vulì ch'el desistia da sia candidatura. El snega dentant dad avair fatg insatge fauss.

RR novitads 16:00