«Ils Franzos n'han betg veglia da l'elecziun»

Clara Vallois e creschida si e viva a Paris en Frantscha - sia mumma è da Sent, perquai discurra ella rumantsch. Er ella dastga eleger dumengia, na sa dentant anc betg tgenin dals 11 candidats che survegn sia vusch. L'atmosfera saja unfisa, ils Franzos n'hajan betg gronda veglia dad insumma eleger.

Placats en Frantscha. Bild in Lightbox öffnen.

Legenda da maletgs: Placats en Frantscha. Keystone

Clara Vallois ha 29 onns, lavura sco translatura e viva a Paris. Avrir maletg en lightbox.

Legenda da maletgs: Clara Vallois ha 29 onns, lavura sco translatura e viva a Paris. MAD

Clara Vallois na sa anc betg tgi ch'ella vul eleger dumengia, i saja vegni discurri uschè bler las davosas emnas ed ils davos mais ed ella na sappia betg pli a tgi ch'ella possia crair ed a tgi betg. Sumegliant giaja quai er ad auters, la glieud haja avunda da quai cumbat electoral.

E na betg be mo da quel mabain insumma da la situaziun politica. Ils socialists han gì ils davos tschintg onns ils mastrins en maun e cuntents na sajan ils Franzos betg. Dentant er ils republicans na sajan betg propi in'alternativa cunquai ch'i vegnia investigà encunter lur candidat.

Motivaziun dad eleger è pitschna

Sut il stritg saja la motivaziun dad insumma ir ad eleger pitschna - en scadin cas tar enconuschents e parents da Clara Vallois. Blers hajan il sentiment ch'i na vegn a sa midar tuttina nagut, e ch'i saja tuttina tgi che vegnia elegì la fin.

Interessant tgi che fetschia la cursa saja dentant tuttina ed ella vegnia segiramain a persequitar ils resultats la dumengia saira, uschia la translatura. La fin giaja quai tuttina per il nov president u la nova presidenta e quel u quella haja enorma pussanza en Frantscha e possia navigar il pajais en la direcziun ch'el u ella veglia.

RR actualitad 07:00