Suenter Brexit e Trump forsa er surpraisa en Frantscha?

Las elecziuns en Frantscha stattan avant porta e cler ch'i dat er qua retschertgas. Quellas mussan che quatter dals indesch candidats èn fitg stretg in datiers l'auter. Uschia pudess quai senz'auter dar ina u l'autra surpresa, di Charles Liebherr il correspondent dad SRF a Paris.

Palais de l'Élysée - tgi dastga abitar en il futur qua? Bild in Lightbox öffnen.

Legenda da maletgs: Palais de l'Élysée - tgi dastga abitar en il futur qua? Keystone

Sin il pli tard dapi che Donald Trump è daventà president dals Stadis Unids u dapi ch'il Brexit è daventà realitad vegnan retschertgas messas pulit en dumonda. E quai uss er en Frantscha.

Anc mai èsi stà uschè stretg

Las retschertgas mussan numnadamein ina cursa fetg stretga tranter ils trais top candidats Emmanuel Macron, Marine Le Pen e François Fillon. Il candidat liber, la candidata dal Front National ed il candidat dals republicans. Els trais han tuts tranter 20% e 25% da las vuschs. Qua po quai senz'auter anc dar surpraisas manegia Charles Liebherr il correspondent dad SRF en Frantscha.

Franzos na san betg tgi eleger

Sper quai sajan ils candidats tuts novs ed i na dettia nagin cler favurit e perquai na sappi bunamain in terz dals Franzos anc betg tgi ch'els vulan eleger. Tuttina, er sch'i è fetg malsegir, i dat ina tendenza: Emmanuel Macron e Marine Le Pen gudagnan l'emprim scrutini. Il segund scrutini vess, tenor retschertga lura Emmanuel Macron da gudagnar, uschia ch'el daventass il nov president da la «grande nation». Dentant eba, las retschertgas èn da giudair cun precauziun, surpresas poi adina dar.

RR actualitad 07:00