Siglir tar il cuntegn

Header

video
La PPS dal Grischun nominescha Roman Hug. Tge è la tactica?
Or da Telesguard dals 13.09.2021.
laschar ir
cuntegn

Elecziuns regenza 2022 Roman Hug va en la cursa per la PPS

Roman Hug vul daventar cusseglier guvernativ, quai ha la PPS dal Grischun dà enconuschent glindesdi. Cun el vul la partida recaltgar in sez en la regenza grischuna, quai suenter ch'i n'ha betg tanschì per ils ultims candidats Walter Schlegel e Heinz Brand. La PPS è stada da las elecziuns naziunalas cun 25,6% da las vuschs la partida cun ils pli blers e las pli bleras votantas e votants. Uss vulan els repeter quai success sin palc chantunal ed er recaltgar in dals dus sez che vegnan libers en la regenza grischuna.

audio
Elecziuns regenza 2022: PPS va cun Roman Hug en il cumbat
03:53 min, Actualitad dals 13.09.2021.
laschar ir. Durada: 03:53 minutas.

Sasez descriva l'um da 40 onns sco persuna cun ina moda e maniera da lavurar analitica, conscienziusa ma tuttina frestga cun in senn per soluziuns pragmaticas. Cunzunt sias experientschas en la legislativa e l'executiva sajan sias fermezzas per candidar sco cusseglier guvernativ.

Tgi è Roman Hug?

Avrir la box Serrar la box
Legenda: Roman Hug RTR

Politicher

  • President da la Partida populara dal Grischun (dapi il 2020)
  • Deputà en il Cussegl grond per il circul Tschintg vitgs (dapi il 2014)
  • President communal da Trimmis (dapi il 2016)

Sper quests uffizis è el er anc commember da la suprastanza da l'Uniun grischuna per il svilup dal territori sco er da l'uniun che promova la Scol'auta spezialisada dal Grischun (FHGR).

Architect, uffizier e chatschader

Roman Hug è architect ed inschignier diplomà. Dapi il 2005 posseda el si'atgna fatschenta ch'el ha engrondì pliras giadas.

En l'armada è el dapi 2018 uffizier. En il temp liber fa el gugent turas da stad e d'enviern ed il settember va el a chatscha.

Strategia da la PPS

La suprastanza da la PPS ha decidì da be ir cun in candidat en il cumbat electoral e quai duai esser il meglier candidat. Perquai sajan els sa decidids per Roman Hug. Era Valérie Favre Accola fiss stada ina pussibla candidata per il sez en la regenza. La decisiun na saja betg crudada cunter ella, mabain per Roman Hug, ha Jan Koch il vicepresident da la partida accentuà. Ins veglia cunzunt persvader las votantas ed ils votants da Roman Hug cun ir tranter la glieud e tschertgar il discurs direct.

Da remplazzar èn l'onn proxim dus sezs en la regenza. Ina giada va Mario Cavigelli (PCD) ed ina giada Christian Rathgeb (PLD). Omadus ston chalar pervi da la limitaziun da temp d'uffizi. Sche Roman Hug vegniss da recaltgar in sez en la regenza fiss la PPS l'emprima giada puspè represchentada en la regenza dapi la separaziun da la PBD l'onn 2008. L'october decidan ils delegads e las delegadas davart la candidatura definitiva da Roman Hug.

RTR novitads 14:00

Artitgels legids il pli savens

Scrollar a sanestra Scrollar a dretga