Siglir tar il cuntegn
cuntegn

politbox Turitg ha profità dals cravals dals onns 80

Vitrinas ruttas, autos en flommas e persunas blessadas. Avant 35 onns, ils 30 da matg 1980, hai dà grevs cravals a Turitg. Quels cravals, ch'èn pli tard vegni numnads ils cravals da l'opera da Turitg, èn stads il signal da partenza per il moviment dals giuvens dals onns 80.

foto en alv e nair, demonstraziun avant ina chasa
Legenda: Las demonstraziuns per spazi per la giuventetgna ils onns 80 a Turitg. Keystone

Entamez quels tumults era Heinz Nigg. Oz è el etnolog e realisatur da films documentars. Da lez temp documentava el cun sia camera da video quai che succediva. "La giuventetgna era en stadi da crisa.", declera Heinz Nigg la situaziun da lez temp.

Mancanza da locals

I na deva naginas localitads nua che la giuventetgna avess pudì viver sia cultura. Ni locals da concerts, ni bars ni clubs nua che lur musica vegneva s

unada. Quella situaziun haja provocà la malcuntentientscha e la gritta sin las autoritads da la citad da Turitg. Sa stgargiada saja questa tensiun en ils tumults avant l'opera da Turitg.
Demonstrà avevan las giuvnas ed ils giuvens cunter in credit da 60 milliuns francs che la citad aveva concedì per laschar sanar l'opera da Turitg. En ils egls dals demonstrants ina provocaziun.

um cun chau blut avant in microfon, el sesa en in biro
Legenda: Heinz Nigg vala sco archivar dal moviment dals onns 80. RTR, A.Camartin

Cravals han fullà via

Oz, 35 onns suenter ils cravals saja bler sa midà. Tenor Heinz Nigg a moda positiva.
Il moviment da la giuventetgna dals onns 80 vegni oz chapì sco origin da la nova citad da cultura innovativa, piuniers che hajan fullà via per ina citad averta ed prosperonta.