Siglir tar il cuntegn
cuntegn

politbox Vuschar cun 16 – ina via crappusa

Duain giuvnas e giuvens gia pudair ir a votar a l’urna cun 16 onns? Davart quai vegn adina puspè discutà en Svizra. Per part era a moda agitada. Piunier en chaussa è il chantun Glaruna che ha inoltrà il dretg da vuschar e d’eleger per minorens gia il 2007.

En il chantun Glaruna pon ils giuvenils da 16 onns gia vuschar ed eleger dapi il 2007.
Legenda: En il chantun Glaruna pon ils giuvenils da 16 onns gia vuschar ed eleger dapi il 2007. Keystone

Suenter la premiera en il Glaruna è la reducziun da la vegliadetgna era vegnida discutada en auters chantuns. Uschia han discutà politichers giuvens en ils chantuns Argovia e Lucerna davart la participaziun da la glieud giuvna. En omadus chantuns dentant adumbatten.

Era en il chantun Berna han ins discutà davart quai politicum. Il november 2009 ha perfin la populaziun gì da decider a l’urna. Mo era qua: Cun 75% na è la proposta vegnida sbittada.

Lantschà nov’emprova

Dacurt han politichers giuvens en il chantun Friburg lantschà ina nov’emprova. Entschatta da l’onn han els surdà a la regenza ed al parlament dal chantun ina moziun en la quala els dumondan d’introducir il dretg da votar e d’eleger per minorens.

Cussegl federal è d'accord

Perfin il Cussegl federal ha gia stuì sa fatschentar cun la dumonda davart la sbassada da la vegliadetgna da votar. La stad passada ha il Cusseglier naziunal Mathias Reynard (PS, VS) inoltrà ina dumonda correspundenta ch’il Cussegl federal ha approvà.