Siglir tar il cuntegn

Elecziuns 2018 Las reacziuns sin la retschertga

En in punct van ils represchentants da las partidas d'accord: L'entira affera da cartels en il sectur da construcziun en l'Engiadina haja in'influenza sin las elecziuns da la regenza.

placats per las elecziuns da la regenza grischuna da tut las partidas
Legenda: Las istorgias enturn il cartel en la branscha da construcziun han in'influenza sin las elecziuns dal zercladur. En quest punct èn tut las partidas dal medem avis. RTR

Dals trais cussegliers guvernativs en uffizi, survegn Jon Domenic Parolini (PBD) las pli paucas vuschs (42%).

Jau crai schon ch'il teater enturn ils cartels ha fatg donn a Jon Domenic Parolini. El ha dentant era in departament difficil da manar.
Autur: Gian MichaelSchef da la campagna electorala (PBD)

In candidat che n'è betg vegnì en las lingias grassas pervia da las cunvegnas da pretschs en la branscha da bajegiar è Peter Peyer (PS). Tenor la retschertga da sotomo fiss el elegì en la regenza (sin plazza 4 cun 38.5%).

Peter Peyer profitescha da betg esser involvì – el persvada dentant era tras sia persuna e betg mo pervia da chaussas che han da far cun auters candidats.
Autur: Beatrice BaselgiaScheffa da la campagna electorala PS

Pli u main tuttina bleras vuschs sco il candidat socialdemocratic, fa il cristiandemocratic Marcus Caduff (38.3%) e recaltgass uschia in segund sez per la PCD en la regenza. E quai malgrà ch'el è tenor la retschertga da sotomo il pli pauc enconuschent en il Grischun.

Igl è adina uschia ch'in candidat nov dovra temp enfin ch'el è enconuschent. Nus avain empruvà da preschentar Marcus Caduff ensemen cun Mario Cavigelli.
Autur: Kevin BrunoldSchef da la campagna electorala PCD

Patì da las discussiuns actualas ha Walter Schlegel (PPS), che survegn las pli paucas vuschs (33.3%) e na fiss uschia betg elegì en la regenza grischuna.

Senza dubi ha Walter Schlegel in problem da reputaziun, pervia da las renfatschas betg giustifitgadas.
Autur: Heinz BrandSchef da la campagna electorala PPS

Anc avant il candidat da la PPS è il candidat independent Linard Bardill cun 36.5%. El na survegn dentant betg mo vuschs da la sanestra, mabain era dals burgaisdemocrats.

Gia mes tat e mes bab faschevan part pli baud als Democrats Grischuns e quai fa forsa pli simpel als burgais da vuschar per mai.
Autur: Linard BardillCandidat independent

Il meglier resultat da tut ils candidats fa Christian Rathgeb (PLD). Cun 61.8% è el be per pauc avant ses collega cristiandemocratic Mario Cavigelli (58.1%).

Nus na deplorain insumma betg d'avair decidì da candidar be cun in candidat. La finamira è che Christian Rathgeb fa in bun resultat.
Autur: Vera StifflerScheffa da fracziun PLD

Las elecziuns da la regenza grischuna e dal Cussegl grond han lieu ils 10 da zercladur 2018.

Elecziuns grischunas 2018

RR actualitad 07:00