Siglir tar il cuntegn
Inhalt

Regenza Bainvegnì, Linard Bardill – din ses sis concurrents

Ord sis èn daventads il mardi puspè set: Ch'il chantautur Linard Bardill candidescha sco independent vegn beneventà da ses sis collegas en la cursa per ils tschintg sezs en la regenza grischuna.

Linard Bardill - il nov candidat per la regenza.
Legenda: Linard Bardill - il nov candidat per la regenza. RTR

I stettia liber a mintgina ed a mintgin da candidar per la regenza Grischuna, sa chapescha er a Linard Bardill. Quai è il tenor general tar tut ils ulteriurs sis candidats.

Ils candidats tranter ils regents actuals

Mario Cavigelli, il president da la regenza è candidat cristiandemocratic manegia, che la candidatura dal candidat independent dettia in zic colur al cumbat electoral e ch'i dettia forsa er dapli attenziun per las elecziuns.

Il liberaldemocrat Christian Rathgeb sa legra sin las debattas cun il chantautur. Tenor el èsi impurtant, ch'er candidats senza partida pon candidar.

Il collega da regenza Jon Domenic Parolini, candidat burgaisdemocrat, enconuscha Linard Bardill gia dapi blers onns e beneventa el sco candidat. El manegia, ch'il candidat independent exprimia sias tenutas da maniera fitg pointada.

Ils candidats novs èn uss en quatter – tuttina...

Da trais candidats novs èsi uss vegnì quatter – tuttina prendan ils candidats novs si gugent a Linard Bardill en lur circul.

Per il socialdemocrat Peter Peyer èsi bun ch'i dettia ina concurrenza per ils sezs en la regenza.

Walter Schlegel, il candidat da la partida populara manegia, ch'el saja spanegià sin il nov candidat.

Er Marcus Caduff, il segund candidat dals cristiandemocrats, prenda serius la candidatura. El sa dumonda dentant sche Bardill possia en uschè curt temp anc mussar a la glieud per tge ch'el stà u sch'ils votants stoppian cumprar il giat en il satg.

RR actualitad 17:20