Siglir tar il cuntegn

Christian Rathgeb (PLD) Persunal: «Jau vuleva vegnir pictur da saivs»

Ozendi è Christian Rathgeb politicher tras e tras. Sco buob a Razén aveva el dentant tut auters plans.

Christian Rathgeb è creschì si a Razén. Là ed a Cuira ha el frequentà las scolas. Silsuenter ha el studegià giurisprudenza a l'universitad da Turitg ed ha era fatg il docter. Politicamain è el gia baud vegnì activ: Cun 16 onns è el stà in dals fundaturs da la PLD giuvna dal Grischun. Suenter ses studi ha el lavurà sco advocat ed ha fatg in praticum tar il departament ch'el maina uss. Il 2012 è el vegnì elegì sco cusseglier guvernativ.

Christian Rathgeb

Lieu: Cuira
Annada: 1970
Professiun: Manader dal departament da giustia, segirezza e sanadad
Hobis: Viandar, turas cun chalzers da naiv, sport, far curtin
Famiglia: En partenadi, trais uffants

In tip sportiv

Sco schef dal departament da sanadad sto Christian Rathgeb ir ordavant cun bun exempel. E quai fa el gugent, moviment tutga tar ses mintgadi. La damaun avant che cumenzar a lavurar va el magari a currer. Ed er las fins d'emna èn emplenidas cun turas cun chalzers da naiv u viandadas cun la famiglia.

Far patgific en curtin

Mintgatant fa dentant er Christian Rathgeb patgific e giauda il temp liber en ses grond curtin a Cuira. Ed apropos curtin: Sco buobet vuleva el vegnir ni politicher ni giurist. El vuleva daventar pictur da saivs da curtin. Ad el pareva quai ina lavur tut patgifica ed el contemplava gugent il pictur dal vitg da Razén che colurava savens saivs.