Siglir tar il cuntegn

Regenza Cumbat piz a cup tranter ils candidats novs

Peter Peyer (PS) e Marcus Caduff (PCD) cumpletteschan la regenza grischuna, sch'i va tenor ina retschertga che l'institut sotomo ha fatg per incumbensa dad RTR e Somedia. Igl è dentant da dir ch'era Linard Bardill (independent) e Walter Schlegel (PPS) han schanzas.

Linard Bardill e Walter Schlegel na fissan betg elegids, tenor la retschertga da sotomo.
Legenda: Linard Bardill e Walter Schlegel na fissan betg elegids, tenor la retschertga da sotomo. RTR

Duas persunas èn actualmain cler a la testa: Christian Rathgeb (PLD) vegn sin 61.8% da las vuschs e Mario Cavigelli sin 58.1%. Sin plazza trais suonda cun retard Jon Domenic Parolini (PBD) che cuntanscha 42% da las vuschs. Ils candidats novs n'èn dentant betg lunsch davos Parolini.

PS defenda ses sez – PCD cun dus sezs

Dals candidats novs survegn Peter Peyer (PS) las bleras vuschs cun 38.5%, suandà da Marcus Caduff (PCD) cun 38.3%. Omadus èn cunquai sin ils chaltgogns dal cusseglier guvernativ Jon Domenic Parolini.

Peter Peyer profitescha dal fatg ch'el è il sulet candidat socialdemocrat aifer ils candidats burgais. Ord sia partida survegn el grond sustegn: 91% dals electurs da la PS han l'intenziun da vuschar per el.

Tenor la retschertga pudess Marcus Caduff ademplir a sia partida il giavisch da reconquistar in segund sez en la regenza grischuna, sper quel da Mario Cavigelli. Per il politolog da sotomo Michael Hermann ha Marcus Caduff dentant anc in deficit: El è pli pauc enconuschent en il Grischun ch'ils auters candidats.

Linard Bardill ha schanzas

Era sch'el ha annunzià sia candidatura pir tard – l'independent Linard Bardill ha schanzas da vegnir elegì ils 10 da zercladur en la regenza grischuna. El survegn 36.5% da las vuschs. Il politolog fa dentant attent, che quests resultats sajan pli malsegirs che quels dals auters candidats, cunquai che sia candidatura saja vegnida enconuschenta pir durant che la retschertga girava gia.

La retschertga da sotomo

Personen-Box aufklappenPersonen-Box zuklappen

La retschertga è vegnida fatga tranter ils 4 ed ils 14 da matg 2018 e quai via las paginas d'internet dad RTR e Somedia e cun in pool dad e-mail da sotomo. En tut èn vegnidas dumandadas 1'495 persunas.

Damai che la candidatura da Linard Bardill è vegnida enconuschenta durant la retschertga, è l'evaluaziun succedida en duas parts. Per l'evaluaziun parziala suenter la candidatura da Linard Bardill èn vegnidas dumandadas 538 persunas.

La quota da malsegirtad munta a +/-3.16%. Tar ils resultats da Linard Bardill po quella quota esser pli auta.

PPS senza represchentant en la regenza

Sin l'ultim plaz da la retschertga sa chatta Walter Schlegel (PPS) cun 33.3% da las vuschs. Cunquai è el era davos il candidat independent Linard Bardill. Al politolog Michael Hermann è dà en egl che Walter Schlegel giaudia plitost pauc sustegn dad electurs da sia partida: Be 75% da la PPS dessan la vusch a lur candidat – cumpareglià cun ses concurrents è quai la pli bassa quota.

Elecziuns grischunas 2018

RR actualitad 06.00