Siglir tar il cuntegn

Elecziuns Smartvote – blers candidats per il parlament èn «schefs»

En il sistem online nua che candidatas e candidats pon inditgar nua ch'els stattan politicamain, han els er pudì inditgar tge professiun ch'els han u tge hobis. Tge che croda en egl: ils blers candidats per il parlament èn «schefs».

Um che stat avant in team da lavurar.
Legenda: Bleras candidatas e candidats per il Cussegl grond èn disads da manar in team. (maletg da simbol) Pixabay

Dals total 170 candidats per ils 120 sezs en il Cussegl grond han 166 emplenì or il formular da smartvote. Uschia pon ins vesair nua ch'ils candidats stattan politicamain. Ultra da quai ves'ins dentant er tge professiun ch'els han u er tge hobis. Spert croda en egl che bunamain in quart dals candidats, numnadamain 39 èn «schefs». 27 inditgeschan ch'els sajan mainagestiuns, 12 ch'els sajan interprendiders. Quai èn cunzunt candidats da partidas burgaisas. Sulettamain in è socialdemocrat ed in da la Verda.

Anc dapli «schefs»

Ed i n'è anc betg a fin cun «schefs». Dals candidats èn numnadamain er blers presidents da vischnanca: 15 han inditgà quai sco professiun. E lu datti anc dapli «schefs» numnadamain ils purs, la terz gronda gruppa cun 11.

Sa chapescha datti er advocats, cussegliaders da finanzas, commerziants, spezialists da tgira, scolasts, pensiunads u er students. Ed i dat er in u l'auter exot: Per exempel datti be in locomotivist, in musicist, in pictur, in sanitari da salvament, in scrinari ed in ortulan.

Hobis: viandar, leger e sport

Ils hobis numnads fitg savens èn per exempel viandar, leger u sport. Dentant er la famiglia è impurtanta a blers. E lura datti er hobis spezials sco per exempel «cigaras» , «vin», «kung-fu», «karate» u er «concepziun dal mund» (Weltanschauung).

RR actualitad 12:00