Siglir tar il cuntegn

Header

audio
Plans dal Green Deal grischun
Or da Actualitad dals 10.08.2021.
laschar ir. Durada: 03:41 minutas.
cuntegn

Emprima etappa 67 milliuns per realisar «Green Deal per il Grischun»

En ina missiva al cussegl grond mussa la regenza, co il Grischun po cuntanscher la finamira «netto nulla emissiuns da gas cun effect da serra» fin il 2050. Fin lura quinta la regenza cun custs da fin 1,8 milliardas francs.

En l'emprima etappa dal Green Deal vul la regenza promover energias regenerablas, l'effizienza energetica, il traffic public, las mesiras per la protecziun dal clima en l'agronomia sco er adattar mesiras per il clima. I sa tracta da mesiras existentas ch'hajan in effect spert che na dovran betg in'adattaziun da la lescha per pudair vegnir realisadas. La regenza dumonda il Cussegl grond per in credit da 67 milliuns francs. La dumonda vegn tractada en la sessiun d'october.

Nus vulain cun ina emprima etappa realisar per 67 milliuns differentas mesiras. En il sectur da traffic, en il sectur da bajetgs, surtut tar l'agricultura. Quai cun mesiras ch'èn gia enconuschentas, simplamain cun impunder dapli meds finanzials.
Autur: Jon Domenic Parolini minister d'ambient

Per pudair realisar la segunda etappa ston ins adattar las premissas legalas e reglar la finanziaziun. Cun il plan d'acziun vegnissan stritgads daners dal chantun per energias fossilas. Quels meds pudess ins investir en l'economia e per stgaffir novas plazzas da lavur en branschas cun avegnir en il chantun. En total quinta il chantun Grischun fin il 2050 cun custs da fin 1,8 milliardas francs.

video
67 milliuns per realisar «Green Deal per il Grischun»
Or da sil punct dals 10.08.2021.
laschar ir

PS pli u main cuntenta, PPS betg

Elavurà il plan d'acziun ha la regenza sin basa d'ina incumbensa ch'il Cussegl grond ha surdà cleramain il 2019. Quella incumbensa ha il deputà socialdemocratic Philip Wilhelm fatg. El è da principi cuntent cun quai che la regenza ha preschentà. La data 2050 saja dentant memia tard, tenor el stuessi ir pli spert. Il plan sco tal saja dentant en urden.

D'in auter avis è Roman Hug, president da la Partida populara dal Grischun. Gia il 2019 era la PPS la suletta fracziun ch'aveva ditg Na al Green Deal. Ed er uss disturba en emprima lingia che la populaziun sto er pajar, saja quai en furma da taxas u taglias. Ins sa dostia dentant betg da principi encunter talas ideas, la PPS vul dentant ch'ins mettia paisa sin novas ideas e na lavuria betg cun scumonds e custs supplementars.

RTR novitads 12:00

Artitgels legids il pli savens

Scrollar a sanestra Scrollar a dretga