Las vacanzas da matg èn per blers Engiadinais las vacanzas principalas da l'onn. Blers hotels, bleras ustarias ed era blers indrizs da sport èn serrads. Las elecziuns dal parlament grischun e la regenza crodan amez questas vacanzas. Quai è ina situaziun speziala per las partidas e lur cumbat electoral.
Pauc surprendent è perquai che tut las partidas han la medema finamira: che las votantas ed ils votants dattan giu lur vuschs avant ch'ir en vacanzas.
Differentas strategias
Anc avant Pasca è arrivà en tut las chasadas ina brev communabla da tut las partidas cun en lur flyers, sco servetsch per la votanta ed il votant. Dasper quai mettan las partidas lur focus sin similas pitgas:
- La PS telefonescha e ramassa suttascpriziuns per ina petiziun davart la plazza aviatica. Ella è activa sin social media ed ha organisà in Repair Cafè, nua che las candidatas ed ils candidats gidan a reparar chaussas.
- La PLD è en contact cun ses commembers, fa inserats, ha realisà in video per social media ed organisà ina saira da discussiun davart la problematica d'abitaziuns.
- La PPS sa focussescha sin contacts persunals, inserats e social media.
- Ils verdliberals mettan il pais sin contacts privats e social media.
- L'Allianza dal Center guarda d'esser preschenta adina puspè sin via, è preschenta sin social media, fa inserats e chartas da lecturs.
Per tut las partidas èsi cler, ch'il termin d'elecziun n'è betg ideal per l'Engiadina. Ch'il cumbat fiss dentant pli animà sche la data fiss il mars u settember na crajan ellas tuttina betg. Insumma saja il cumbat en la rait daventada bler pli impurtanta che placats u sairas da discussiun, han tut ils responsabels ditg envers RTR. Perquai saja il focus surtut sin social media e betg sin inscunters fisics.