- A partir da l'auter glindesdis pon tuttas persunas davent da 16 onns laschar dar ina vaccinaziun da booster, sche lur immunisaziun è pli ditg enavos che 6 mais.
- La regenza planisescha dapli letgs e persunal sin la staziun intensiva a Cuira
- Ils certificats cun tests da manaschis restan probablamain gratuits enfin la fin da la stagiun d'enviern
- Il program da tests duai vinavant gidar a franar la pandemia
- L'uffizi da sanadad sustegna l'extensiun da las capacitads da tests tras purschiders privats
- Enfin la fin da l'onn datti in ulteriur «walk-in» per sa laschar vaccinar tar la Rheinfelsstrasse 5 a Cuira
- Il contact tracing mida temporarmain ad ina autoregistraziun
Tut las mesiras han la finamira d'impedir ch'il sistem da sanadad vegnia surchargià. Ellas duajan dentant era segirar la stagiun d'enviern turistica, ch'è impurtanta per il Grischun. Lezza duai vegnir concepida en moda uschè segira e cun uschè paucas difficultats sco pussaivel. Per quest concept da protecziun vegni quintà cun custs tranter 10 e 35 milliuns francs, tut tenor participaziun da la Confederaziun ed ils custs per vaccinaziuns e tests. Il credit sto vegnir approvà da la cumissiun da gestiun dal Cussegl Grond.
Nus avain uschè bleras novas infecziun sco anc mai. Ma cun la virola avain nus uss in med cunter cumprovà.
Per dar dumogn a la stagiun d'enviern ha la regenza grischuna elavurà in concept da protecziun. La regenza vul tegnair a bass il dumber d'infecziuns cun mesiras sistematicas e betg mesiras severas e scumonds che restrenschan puspè la vita publica.
