La Confederaziun avertescha oz suentermezdi danovamain da ferms urizis. Per la gronda part da la Svizra, uschia er per il Grischun Central e dal Nord, valia il privel 3 da 4. Quai ha communitgà MeteoSvizra via Twitter.
La zona da pressiun bassa «Ferdinand» che vegn nà dal vest, portia per part ferms urizis cun blera plievgia, localmain er granella. Nua exact ch'i vegn a plover saja dentant difficil da prognostitgar.
Fin uss èn questa stad duas persunas mortas tar malauras en Svizra. Pliras èn vegnidas blessadas, per part grevamain. Il donn material munta tenor emprimas calculaziuns a plirs tschient milliuns francs.