La populaziun feminina n'è actualmain betg be ferm sutrepreschentada en il Cussegl grond e la regenza, mabain er en l'executiva da las vischnancas. Be 112 dals total 533 sezs en suprastanzas èn occupads da dunnas. La pli gronda cumpart da dunnas en suprastanzas communalas datti en la regiun Plessur, cun exact in quart. En las trais regiuns Alvra, Bernina e Landquart n'hai naginas dunnas al chau da las suprastanzas, en la regiun Plessur vegnan duas da las quatter vischnancas manadas da dunnas. Actualmain han las 14 vischnancas Arosa, Panaduz, Cazas, Churwalden, Fideris, Furna, Glion, Masein, Puntraschigna, San Vittore, Seewis en il Partenz, Segl, Urmein e Val Müstair ina dunna che presidiescha.
La populaziun feminina n'è actualmain betg be ferm sutrepreschentada en il Cussegl grond e la regenza, mabain er en l'executiva da las vischnancas politicas.
17 vischnancas grischunas han per il mument in parlament, quel cumplettescha u remplazza la radunanza communala. Fertant ch'il parlament da la vischnanca da Samignun consista be dad umens, sesan 7 dunnas en il parlament da 17 persunas a Tavau. Total giascha la cumpart da dunnas en ils 17 parlaments grischuns tar 22%. In zic meglier guardi or tar las cumissiuns da gestiun. Quels han ina cumpart da 31% dunnas. 102 dunnas stattan dasper 226 umens en questas cumissiuns.
Attracziun entras las elecziuns 2022
Il cusseglier guvernativ Christian Rathgeb è persvas che las elecziuns per il Cussegl grond dal 2022, vegnan er ad avair in effect per promover dunnas. L'engaschament politic da las partidas da metter a disposiziun uschè bleras candidatas e candidats sco pussaivel per las elecziuns chantunalas, pudess augmentar en general il gust sin in uffizi politic. Plinavant spera il chantun ch'il project da sustegn «Promo Femina» vegnia gia bainbaud a purtar fritg.
Cun «Promo Femina» vulan la Scola auta spezialisada dal Grischun FHGR e tschintg biros d'egualitad chantunals augmentar l'engaschament politic da dunnas sin il palc da las vischnancas. Uschia duai vegnir cumbattida la sutrepreschentaziun da dunnas, ed il giavisch per dapli diversitad ed egualitad duai vegnir ademplì. Sco ulteriura finamira duai il sustegn per occupar quests gremis garantir che las vischnancas funcziunan er vinavant.
