Siglir tar il cuntegn

Header

cuntegn

1,11 grad sur la media 2021 è puspè stà in onn chaud

2021 è stà il 7avel onn en fila nua che la temperatura è stada en media passa 1 grad sur il nivel preindustrial. Medemamain èsi era stà in dals set pli chauds onns dapi l'entschatta da las registraziuns avant passa 100 onns. Quai ha communitgà l’organisaziun mundiala da l’aura a Genevra (WMO). I haja dà temperaturas chaudas malgrà il fenomen da l’aura «La Niña». Quel sbassa mintga per onns la temperatura media globala cun sfradentar l'aua dal Pacific da l'Ost.

L’onn 2021 è la temperatura media globala stada 1,11 grads sur il nivel dals onns 1850 enfin 1900. Il pli chaud onn è stà il 2016 cun radund 1,2 grads sur il nivel preindustrial. I saja da quintar vinavant cun onns fitg chauds pervi da la concentraziun da record da gas cun effect da serra.

La WMO prenda per sia statistica las datas da sis differentas instituziuns dal clima. Tranter auter da l'Uffizi per il clima dals Stadis Unids da l'America «NOAA» e dal servetsch da la midada dal clima da l'UE «Copernicus».

Ord l'archiv

Er la Grezia è stada pertutgada da grondas chaliras il 2021. Co la situaziun era là ha Selina Caduff raquintà ad RTR:

audio
Chaliras: Selina Caduff raquinta da la situaziun a Rhodos
ord Actualitad dals 05.08.2021.
laschar ir. Durada: 2 minutas 40 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga