Siglir tar il cuntegn

Exteriur 1,8 kilos greva e gronda sco ina balla da ballapè

L'object sgulant da la NASA duai far part dad in'expediziun da la NASA che vegn spedida en viadi l'onn 2020. En il favrer 2021 duai la drona u il helicopterin lura mussar il mars ord la perspectiva d'utschè, scriva l'agentura da novitads svizra SDA.

Ina grafica dal Mars cun helicopterin.
Legenda: Dal 2020 cun in helicopterin sin il Mars – ed uschia s'imagina la NASA che quai pudess vesair ora. Keystone

En vista al boom da dronas sin nos planet n'è l'idea, da vulair perscrutar il Mars cun in tal object sgulant betg propi revoluziunaria – pudess ins pensar.

Sgular sin il Mars – sco sgular tar 30'500 meters sur terra

Per ils tecnicists da l'agenzia astronautica americana NASA è quest'idea dentant ina sfida speziala. Per far sgular in object be pauc sur la surfatscha dal planet cotschen han els da resguardar l'atmosfera particulara dal Mars. Quella è bler pli fina sco sin la terra.

Gia be da far partir l'object davent da la surfatscha dal Mars en l'atmosfera saja da congualar cun in sgol d'helicopter sin in autezza da 30'500 meters sur terra, citescha la SDA la scheffa dal project Mimi Aung. Enfin uss è il record d'autezza dad in sgol d'helicopter sin nos planet tar 12'100 meters.

Uschia ha preschentà la NASA ses helicopterin:

Atmosfera dal Mars pretenda construcziun particulara

Per betg be pudair partir davent da la surfatscha ma per savair sgular sur il Mars vi vuli in object sgulant super-lev cun motor super-ferm. Il helicopterin dal Mars vegnia a survegnir dus pèrs da rotors che sa volvan 3'000 giadas la minuta. Quai è 10 giadas dapli ch'in helicopter sin terra.

Il project custia bler, mainia dentant er bler, citescha l'agentura a Mimi Aung.

Il Mars sco lieu d'abitar per generaziuns futuras

Sch'il helicopterin n'ha betg success cun sia missiun ha la NASA anc in auter trumf en la mongia: Part principala da la missiun è in nov vehichel, in uschenumnà «Mars-Rover». Quel funcziunia independentamain dal helicopterin.

El duai ir en tschertga da materias primas e fastizs da vita e perscrutar, quant abitabel ch'il Mars è.

RR novitads 09:00