Sur 300’000 persunas èn mortas pervi da quest terratrembel e 3,2 milliuns carstgauns èn stads pertutgads da la catastrofa.
Sinaquai ha la populaziun Svizra fatg donaziuns da passa 66 milliuns francs per l'agid a Haiti. La Chadaina da fortuna ha investì quels daners en 91 projects d’agid. Per exempel en agid d’urgenza, mesiras preventivas per cas da catastrofas e 65% en la reconstrucziun.
Situaziun actuala a Haiti
Haiti ha mumentan da batter cun problems politics che lain era enavos ses fastizs negativs en l’economia. Tenor Priska Spörri na saja la situaziun actuala a Haiti betg simpla. betg be per ils indigens, ma era per las ovras d’agid partenarias. Igl è fitg malsegir pervia da las demonstraziuns e las tensiuns. Massa vias èn bloccadas e la glieud na vul betg pli ir ora sin via, di Priska Spörri. Ella leva ir cun la Chadaina da fortuna il November passà a Haiti per gidar, ma ord motivs da segirezza n’èn els lura betg ids.
Analisa d’influenza - in pèr resultats
La Chadaina da fortuna ha laschà intercurir, tge effect che ses agid ha gì en il Haiti: 525 chasadas èn vegnidas dumandadas, igl ha dà 52 discussiuns da gruppa ed 87 intervistas. Silsuenter han 26 scienziads analisà las datas:
- 100% dals albierts che la Chadaina da fortuna ha finanzià èn ecologics
- 95% dals dumandads che han survegnì in nov dachasa vivan anc adina là
- 84% dals dumandads sa sentan protegids da privels dal clima
- 58% da las chasadas han absolvì ina scolaziun
Ord l'archiv:
RTR actualitad 07:00