Siglir tar il cuntegn

Exteriur 14'000 fugian dal Sudan dal sid aifer 2 emnas

Da quai da 14’000 persunas èn fugidas las duas davosas emnas da la guerra civila en il Sudan dal sid en il pajais vischin Sudan. Quai communitgescha la ONU.

La gronda part dals fugitivs èn dunnas ed uffants.
Legenda: Senz'agid umanitar èn epidemias in privel imminent en vista da la perioda da plievgia. Keystone

La gronda part dals fugitivs èn dunnas ed uffants. Dapi ch'il Sudan dal sid e sa deliberà dal Sudan avant 4 onns patescha il Sudan dal sid da la violenza da gruppas armadas. Il cumbat da pussanza tranter il president Salva Kiir e ses anteriur vice Riek Machar han manà ad ina guerra civila.

Enorms dumbers umans

Entras l’unda da fugitivs saja en il Sudan naschì ina «crisa en la crisa», ha ditg Ann Encontre, la coordinatura dal UNHCR per il Sudan dal sid. Tenor indicaziuns da la UN haja gia dà plirs 10’000 morts en il conflict. 2 milliuns persunas sajan fugidas da la violenza. Passa 175’000 Sudanais dal sid sajan scappads en il Sudan.

Basegn da 135 milliuns euros

Per pudair gidar ils fugitivs dovria la ONU tenor atgnas indicaziuns daners d’agid en l’autezza da 135 milliuns euros. Enfin uss èn sulettamain 10% da quella summa vegnids ensemen. Cun ils daners vul la ONU cunzunt bajegiar alloschis d’urgenza. Quels ston esser pronts fin la perioda da plievgia che cumenzà en in per emnas.

RR novitads 12:00