Tge è capità? Ina gondla cun excursiunistas ed excursiunists è crudada ord motiv anc nunenconuschents en la profunditad a Stresa, en il vest dal Lago Maggiore, datiers dal cunfin svizzer. 13 persunas han pers lur vita, quai tenor las forzas da salvament. La gondla è dada giu curt avant la staziun sisum (1420 m.s.m) ord in'autezza da 15 fin 20 meters sin ina largia da guaud.
Datti survivents? Suenter l'accident èn dus uffants grevamain blessads vegnids sgulads cun helicopter en ina clinica a Torino. Là è in dals uffants mort la saira uschia ch'il dumber da morts è s'augmentà sin 14. Il segund uffant, in buob da tschintg onns che ha fermas ruttadiras a las chommas è vegnì operà e stabilisà, uschia rapporta l'agentura da novitads Adnkronos.
Co ha quai pudì capitar? La pendiculara era sin viadi tranter il lieu Stresa a la riva dal vest dal lai ed il Monte Montarrone cura ch'ella è tuttenina dada giu. In investigader dals Carabinieri ha ditg, tenor agenturas da novitads, ch'ina suga saja sa distatgada. Viandants en la vischinanza avevan udì avant la crudada in ferm siblar, quai che pudess medemamaian inditgar ch'ina suga è stgarpada.
Tranter il 2014 ed il 2016 è la pendiculara stada ord funcziun, en connex cun lavurs da renovaziun e mantegniment. Avant var in mais era la pendiculara puspè ida en funcziun, suenter ina pausa pli lunga pervi da la pandemia da corona. La procura publida da la vischnanca Verbania, en la regiun Piemont, ha lantschà investigaziuns.
Stresa è in lieu popular per far excursiuns
Datti Svizras u Svizzers tranter las unfrendas? La disgrazia è capitada datiers dal cunfin svizzer. Tranter las unfrendas na dettia però naginas unfrendas da la Svizra ha communitgà il Departament federal da l’exteriur EDA. Il consulat general svizzer a Milaun aveva contact cun las autoritads talianas.
Co reagescha la politica? «L'accident da pendiculara tragic fetschia trist e gronds quitads per quels che cumbattian en questas uras per lur vita», ha communitgà il president da l'Italia, Sergio Mattarella. Er il primminister Mario Draghi ha condolà a las famiglias da las unfrendas en num da la regenza. Il president da la regiun Piemont, Alberto Ciro, ha pretendì che la disgrazia vegnia sclerida. Er la scheffa da la cumissiun da l'UE Ursula von der Leyen, il president dal cussegl da l'UE Charles Michel ed il president dal parlament da l'UE David Sassoli han exprimì lur contristezza.