Il bus è charrà la damaun marvegl a las 07:00 a Münchberg en in camiun-tractor che steva airi a la fin d'ina colonna. Il bus è brischà or cumplettamain. Stà enavos è be il skelet dal vrac
Il bus è partì cun en tut 48 persunas, 46 passagiers e 2 manischunzs, da Sachsen il gliendesdi. Tar la derivanza da la gruppa e lur destinaziun n'ha la polizia betg fatg indicaziuns. Il bus che ha gì l'accident è brischà cumplettamain, quai di il pledader da la polizia Jürgen Stadter. 30 persunas sajan blessadas, pliras da quellas grevamain.
Acziun gronda dals servetschs da salvament
La polizia ha serrà cumplettamain en omaduas direcziuns l'A9. Radund 200 persunas dals servetschs da salvament, da pumpiers e da la polizia èn stadas en acziun. Plinavant èn plirs helicopters stads en acziun al lieu da l'accident.
Sco consequenza hai dà lungas colonnas. La polizia ha supplitgà la populaziun via Twitter da guntgir uschè lunsch sco pussibel il lieu da l'accident. En direcziun sid duain ins gia bandunar l'autostrada sur l'A72 ed l'A93.
Crititga vers persunas mirvegliusas
Il minister da traffic tudestg, Alexander Dobrindt, ha crititgà il cumportament da plirs automobilists. I saja irresponsabel e turpegius da reducir il tempo sin il vial oppost per guardar tge che saja capità. Quest cumportament haja er impedì la lavur da las forzas da salvament. El saja pront d’augmentar las multas per mirveglius marcantamain – ha ditg Dobrindt en la televisiun.
RR novitads 11:00++