Siglir tar il cuntegn

Header

Purtret d'ina cuntrada plain glatsch en l'Antarctica.
Legenda: En l'Antarctica hai dà cun 20,75°C in nov record da temperatura. Keystone
cuntegn

20,75°C Record da temperatura en l'Antarctica

Perscrutaders han annunzià in nov record da temperatura en l'Antarctica. La staziun da mesiraziun al piz dal nord da l'Antarctica ha mesirà ils 9 da favrer 20,75°C, ha declerà il perscrutader brasilian Carlos Schaefer.

Anc mai hai dà en l'Antarctica ina temperatura uschè auta.
Autur: Carlos Schaeferperscrutader brasilian

La mesiraziun tar la staziun da perscrutaziun Marambio è part d'in project da perscrutaziun che va sur 20 onns. Quel duai examinar las consequenzas da la midada dal clima sin la schelira permanenta en la regiun. L'ultim record da temperatura saja stà tar 19°C ha Schaefer declerà.

Schaefer ha dentant accentuà ch'il record na laschia betg far conclusiuns davart temperaturas futuras u il svilup da quellas. I sa tractia be d'in punct da datas.

Staziun Esperanza er mesirà record

Pir avant in'emna aveva l'autoritad da l'aura argentina annunzià d'avair mesirà la pli chauda temperatura dapi l'entschatta da lur mesiraziuns. Sin la staziun da mesiraziun Esperanza ha l'argient viv mussà ils 7 da favrer 18,3°C.

L'Argentina è represchentada gia dapi 114 onns en l'Antarctica e documentescha dapi il 1961 las temperaturas sin pliras staziuns dal continent.

Ultim decenni è stà il pli chaud fin uss

Tenor indicaziuns da l'ONU è l'ultim decenni stà il pli chaud dapi l'entschatta da las mesiraziuns en l'Antarctica. Ils glatschers da l'Antarctica che lieuan pervi da la midada dal clima èn in dals facturs ils pli principals per il livel da la mar che s'auza.

Ord l'archiv da SRF

video
In sportist extrem è nudà en l'Antarctica
Or da SRF News dals 27.01.2020.
laschar ir

RTR novitads 14:00

Artitgels legids il pli savens

Scrollar a sanestra Scrollar a dretga