Siglir tar il cuntegn

Header

In'acziun da protest da voluntaris e sustegniders davant il champ a Moria, ils 24 da mars 2016.
Legenda: In'acziun da protest da voluntaris e sustegniders davant il champ a Moria, ils 24 da mars 2016. Keystone
cuntegn

Exteriur 20 milliuns dollars dals Stadis Unids per agid da fugitivs

La viceministra da l’exteriur americana Heather Higginbottom ha visità l’insla grecca Lesbos. A quella chaschun ha ella empermess 20 milliuns dollars per l’agid da fugitivs en l’Europa. Ils daners duai cunzunt l’aut cumissariat per fugitivs UNHCR survegnir.

Ils Stadis Unids vulan survegliar che la cunvegna tranter l’Uniun europeica e la Tirchia na sminueschia betg il dretg d’asil e la protecziun dals fugitivs, ha ditg Higginbottem suenter la visita dal champ da registraziun Moria.

Internà senza culpa

Durant la visita da la ministra han plirs tozzels fugitivs protestà cunter lur internaziun a Moria e per lur libertad. Dapi ils 20 da mars na dastgan ils fugitivs betg pli bandunar il champ da registraziun.

Las midadas areguard il tractament dals fugitivs en Grezia è vegnì crititgà fermamain, cunzunt da pliras organisaziuns d’agid. A Moria vegnian serrads en umans che n’hajan «commess nagins crims», uschia l’ambassadur d’Oxfam per la Grezia, Giovanni Riccardi Candiani. Moria saja daventà «in center da stuschar davent serrà».

Passa 4'000 persunas sin inslas greccas

Gia avant aveva l’organisaziun d’agid da l’ONU UNHCR sco er ils Medis senza cunfins declerà da terminar lur lavur a Moria, perquai ch’il champ da registraziun saja daventà in champ d’internaziun.

Tenor las autoritads greccas eran glindesdi passa 4’289 fugitivs sin las inslas Lesbos, Chios, Samos, Rhodos e Kastellorizo; bun la mesadad sa chattan a Lesbos (2’068).

RR novitads 06:00

sda/alb

Artitgels legì il pli savens

Nach links scrollen Nach rechts scrollen