L'um franzos duai appartegnair a l'organisaziun terroristica Stadi islamic – ch'aveva commess las attatgas terroristicas dal november 2015 a Paris e quellas dal mars 2016 a Brüssel. Sentenzià è el dentant vegnì pervi d'in sajettim a Brüssel avant sia arrestaziun.
L'attentader probabel da Paris n'è betg cumparì avant dretgira a Brüssel. L'um ch'è era sentenzià ensemen cun el è era sentenzià a 20 onns praschun. Omadus duain plinavant pajar chastis.
Sentenzia pervi da Brüssel, betg Paris
En quest cas èn ils dus umens vegnids sentenziads pervi d'in sajettim a Brüssel e betg pervi dals attentats da Paris. Ils dus umens n'avevan betg vulì vegnir arrestads a Brüssel ed èn sa dustads. Durant il sajettim èn plirs policists vegnids blessads. In suspectà era vegnì mazzà là.
La sentenzia pervi da l'attentat da Paris vegn pir anc. Las retschertgas vastas vegnian anc a cuzzar almain enfin il 2019. Il november 2015 avevan attentaders mazzà 130 persunas a Paris. L'organisaziun terroristica Stadi Islamic aveva reclamà l'attentat per ella.
Cas da Paris ha precedenza
L'attentader probabel da Paris resta en arrest d'inquisiziun a Paris. La sentenzia belgia cumenza el pir suenter la sentenzia eventuala per Paris e cura che quella è a fin. Cunter la sentenzia da la Belgia po il delinquent plinavant anc far recurs.
RR novitads 12:00