A Tunis èn 21 persunas mortas tar in'attatga sin in museum en il center da la chapitala. Tenor il ministeri da l'intern hajan almain dus umens armads cun buis Kalaschnikows fatg l'attatga.
Da las 21 persunas mortas sa tractia da 17 turists, glieud da la Germania, Italia, Pologna e Spagna. Plinavant sajan 24 persunas vegnidas blessadas tar l'attentat communitgescha il primminister da la Tunesia Habib Essid. Morts èn era ils dus attentaders. La polizia ha gì circumdà il museum datiers dal bajetg dal parlament.
