Fin ussa han ils atlets e las atletas als gieus olimpics a Rio stuì dar giu bunamain 3'200 emprovas da doping. Quai ha ditg Richard Budgett, il directur da la cumissiun medizinala e scientifica dal Comité olimpic internaziunal.
En detagl haja dà 2700 emprovas d'urin, 190 emprovas da sang e bunamain 300 controllas dal pass biologic da sportistas e sportists. Fin ussa èn enconuschent trais cas da doping. - Per l'emprima giada en l'istorgia dals gieus olimpics decida ina da las duas chombras ad hoc dal Tribunal internaziunal dal sport en il lieu davart fallaments da doping.