Ir da Berlin vest a l’ost era pussaivel per Iso Camartin, e quai ha el fatg intginas giadas, dentant adina cun in nausch sentiment. Il cunfin eri in lieu nua ch’ins vegniva corporalmain en contact cun in sistem da polizia ch'eri in sistem da terrur.
Quels policists ch’eran qua avevan in’egliada absolutamain penetranta. Policists sco roboters da l’interpresa DDR.
La DDR haja fatg naufragi per l’ina perquai che la populaziun na dastgava betg ir ord l'atgna patria, dentant era, perquai che l'economia na funcziunava insumma betg, di Iso Camartin. L'economia era talmain nuneffectiva e nunproductiva ch’ella na pudeva betg cuvrir ils basegns quotidians da la populaziun.
La resistenza crescha
Encunter la fin da la DDR hai dà demonstraziun paschaivlas, sco per exempel ina processiun da glisch a Leipzig. In protest ruassaivel, cun intensitad enstagl da canera. Il sistem da la DDR ha cumenzà a balluccar.
Portas avertas
Iso Camartin è ils 9 da november 1989 en il collegi da scienziads a Berlin. E sco mintga saira mira el l’emissiun «Tagesthemen» cun ses collegas. E cura ch’ils pleds «portas avertas» crodan, sa mettan els immediat sin via tar il Brandenburger Tor.
Tuts han ditg, sch’i ha insacura dà in di nua che nus na dastgain betg ir a letg, mabain stuain immediat ir a mirar tge che capita, lura è quai questa saira.
La glieud saja vegnida da tut las varts, sur il mir, tras la Friedrichstrasse, nunenconuschents hajan embratschà in l’auter. El haja discurrì enfin a las 4 la notg cun persunas e tuts hajan ditg il medem: Mai avessan nus cartì che la midada capitia uschè svelt e senza ch'in sajet croda. Vesair co insatge cupitga, che vegniva tegnì ensemen cun dents da fier ils pli pussants pussibel, quai n’haja el anc mai experimentà sco quella saira.
RR actualitad 08:00