Siglir tar il cuntegn

Header

Navigaziun

cuntegn

Exteriur 300 onns Principadi da Liechtenstein – Tgi èn noss vischins?

Oz festiveschan ils abitants da Liechtenstein 300 onns principadi. Mo darar audan ins en las medias dal pitschen pajais da l'Europa. Co patratgan vairamain noss vischins da Liechtenstein?

Ils 23 da schaner festiveschan ils abitants da Liechtenstein il giubileum da 300 onns. Perquai èn planisadas durant l'onn 2019 pliras occurenzas. Tranter auter stà sin il program da far ina gronda excursiun cun il pievel tras las bellas cuntradas da Liechtenstein. Plinavant datti pliras exposiziuns e vernissaschas sur da l'art e l'istorgia dal principadi. Planisà èsi er da far ina gronda festa cun fieu artifizial ils 15 d'avust – il di naziunal da Liechtenstein.

Cultura e linguatg – sumegliant sco en Svizra

Gieri Blumenthal ch'è oriund da Degen viva e lavura dapi 25 onns en il principadi. El ha maridà in'abitanta da Liechtenstein e maina a Triesen in'interpresa. Il pievel ed il pajais enconuscha el bain. Ina sumeglientscha ch'ils Svizzers ed ils da Liechtenstein partian, saja la tenuta envers la lavur. Tenor Gieri Blumenthal èn omaduas naziuns fitg lavurusas. Er il pledader da medias da «Lichtenstein Marketing» Joël Grandchamp vesa la relaziun tranter quellas naziuns:

I dat be duas differenzas – il dialect e la maniera famigliara tranter il pievel
Autur: Joël Grandchamp

«Ins admetta betg gugent ch'ins è dependents»

Er in pitschen pajais dovra l'entira administraziun naziunala. Quai èn bleras plazzas che ston vegnir occupadas. Qua tras lavuran radund 1'000 dals circa 38'000 abitants tar il stadi. Tuttina èsi la realitad, ch'ils da Liechtenstein èn dependents da la Svizra: Tranter la Svizra ed il Liechtenstein datti radund 100 contracts che duessan gidar a Liechtenstein da mantegnair l'administraziun dal pajais. Gieri Blumenthal di dentant:

Ils abitants èn loschs d'esser part d'in principadi e d'avair in agen pajais. Els n'admettan dentant betg gugent che lur pajais è fitg dependet da la Svizra.
Autur: Gieri Blumenthal

Daventar burgais da Liechtenstein – I dat ina gronda premissa

Il Principadi da Liechtenstein enconuscha, sco la Svizra era, duas pussaivladads da survegnir il pass: la natiralisaziun ordinaria ed facilitada. En omaduas pajais èn las premissas fitg autas. Il Liechtenstein va dentant aunc in pass pli lunsch, el na lubescha betg burgais dubels. Tgi che vul obtegnair il pass dal Principadi dal Liechtenstein, quel ha da da giu ses pass vegl.

Quella regulaziun drastica è definida èn il dretg da burgais da Liechtenstein. Tras quai ch'il Liechtenstein è in dals pli pitschens pajais sin il mund, han els magari betg avunda resursas da scriver tut las leschas sez. Ord quai motiv han els surprendì tschertas leschas d'auters pajais. Tar il dretg da burgais han ins per exempel surprendì las leschas da l'Austria.

RR actualitad 12:00