Siglir tar il cuntegn

Header

Cover dal nov comic dad Asterix.
cuntegn

38avel comic Dus Gals, plirs giuvenils, blers problems

Oz cumpara la nova aventura dad Asterix. En quella na cumbattan el e ses collegas dentant betg cunter ils Romans, ma surtut cunter ils giuvens. Il nov comic porta il num «La figlia da Vercingetorix».

Ina saira arriva ina gruppa da Gals en il vitg dad Asterix ed Obelix, tranter els er Adrenaline, la figlia da Vercingetorix. Quel è stà cumandant dals Gals en la guerra cunter l'imperatur Julius Caesar. Il cumbat han ils Gals pers, Gallia è sut controlla da Roma (cun excepziun dal vitg dad Asterix).

Ils accumpagnaders dad Adrenaline vulan zuppar ella en il vitg dals Romans e rapinar ella, sco simbol dal triunf. Adrenaline è dentant ina rebella che vul viver en libertad: Ina notg fugia ella, cun l'agid d'in pèr giuvenils dal vitg. La tschertga cumenza.

Giuvenils en il focus

Ina giuvna rebella, ch'arriva en in vitg quiet, plitost conservativ: en quel scenari han l'autur Jean-Yves Ferri ed il dissegnader Didier Conrad vesì grond potenzial. Tut il cudesch tracta da differenzas e dals conflicts tranter giuvens e lur geniturs u simplamain persunas pli veglias.

Uschia sa dosta Adrenaline da trair en in vestgì. Dus figls or dal vitg s'opponan envers lur babs. Quels vulessan numnadamain, ch'ils figls emprendian la medema professiun sco els. Pli tard s'agitan ils trais giuvenils da la chatscha excesiva sin ils portgs selvadis – surtut per Obelix betg da chapir. Quai ha tschertas parallelas cun ils moviments da «Friday for future». Quai saja dentant «mo casualitad», manegian ils auturs.

Allusiuns e gieus da pleds

Er la nova istorgia porscha differentas allusiuns ed ina pluna clischés. Uschia porta Adrenaline ina sort collier, che guarda or sco uregliers per tadlar musica. In dals giuvens fabritgescha ina chapellina che sumeglia ferm ad in chapitscha ch'è oz moderna.

RR actualitad 08:00