- 3 burgais vietnamais èn morts tar l'explosiun datiers d'in bus da turists. Er lur guid egipzian è mort.
- 11 Vietnamais ed il manischunz dal bus sajan vegnids blessads.
Ina bumba construida sezza è explodida sin ina via datiers da las piramidas da Gizeh, ha communitgà il ministeri da l'intern en la chapitala Cairo. Tar ils dus morts sa tractia da dus burgais vietnamais. La bumba saja stada plazzada datiers d'in mir en la part da la citad cun num Haram.
En il bus èn stads da viadi 14 turists vietnamais. Trais dad els han pers la vita. Plinavant è er mort il guid da la gruppa ed il manischunz dal bus è vegnì blessà.
Schef da regenza deplorescha attatga
Il schef da regenza da l'Egipta, Mustafa Madbuli ha ditg che l'attatga saja deplorabla. Dumandà suenter las consequenzas pussaivlas da l'attatga per l'Egipta ha Madbuli respundì ch'i dettia nagin pajais nua ch'i dettia naginas attatgas. Tala violenza possia er capitar puspè en il futur.
Nagin pajais sin il mund po garantir la segirezza absoluta.
Turissem patescha ferm
Las piramidas da Gizeh tutgan tar las attracziuns turisticas pli signifitgantas da l'Egipta. Adina puspè datti en Egipta attatgas sin turists. A la branscha da turissem en il pajais ha quai gia fatg grond donn. Il dumber da turists è sa reducì fermamain dapi la «Primavaira araba» il 2011, era dentant sa revegnì l'ultim temp.
Sur tut sin la peninsla da Sinai datti adina puspè attatgas. Dentant è er la chapitala Cairo adina puspè mira dad attatgas violentas. L'ultim èn mortas 7 persunas tar in'attatga sin pelegrins copts, l'entschatta november.
RR novitads 20:00