A Roma ha Papa Franzestg beatifitgà Papa Gion Paul I, quai stgars 44 onns suenter sia mort. Gion Paul I era vegnì Papa il 1978 ed è mort be 33 dis suenter si'elecziun. Cun quai è la durada d'uffizi da Gion Paul I stada ina da las plicurtas en l'istorgia da la baselgia catolica. Il pontifex era er enconuschent sco «il papa dal surrir». Ses successur è daventà Gion Paul II da la Pologna.
La procedura per la beatificaziun dura gia dapi l’onn 2003. L'october passà aveva Papa Franzestg renconuschì ina guariziun miraculusa ch'ha gì lieu sin l'intercessiun da Gion Paul I. Quai correspunda a las cundiziuns per ina beatificaziun. En il cas concret saja a Buenos Aires l’onn 2011 ina giuvna da 11 onns, ch’era apparentamain incurable muribunda, puspè daventada sauna suenter ch’in plevon ha urà a Gion Paul I.
