Las meglras schanzas per il post da presidi da la FIFA han il schaic Salman bin Ibrahim al-Chalifa da Bahrain ed il Svizzer Gianni Infantino. Plinavant candideschan il prinzi da la Jordania, Ali bin al-Hussein, il Franzos Jérôme Champagne ed il Sidafrican Tokyo Sexwale. Quai trio ha dentant sulet ina schanza teoretica.
- Gianni Infantino
- Schaic Salman bin Ibrahim al-Chalifa
- Prinzi Ali bin al-Hussein
- Jérôme Champagne
- Tokyo Sexwale
Gianni Infantino
Il burgais dubel svizzer-talian ha 45 onns e lavura dapi 15 onns per l’Uniun europeica da ballape, dapi il 2009 è el secretari general da l'UEFA. Perquai ch’il president da l’UEFA Michel Platini è suspendì e na dastga betg candidar ha l’UEFA proponì ses numer 2 Infantino. L’anteriur advocat è in dals sulets che n’è betg involvì en scandals da la FIFA. El è sco Sepp Blatter in Vallesan. Gianni Infantino propona en l’avegnir campiunadis mundials da ballape cun 40 enstagl da 32 equipas.
Schaic Salman bin Ibrahim al-Chalifa
Il schaic da 50 onns da Bahrain è dapi il matg 2013 president da la Federaziun asiatica da ballape. Al schaic e sia famiglia rinfatschan las organisaziuns da dretg uman d'avair supprimì cun violenza las demonstraziuns encunter la regenza il 2011 a Bahrain. Sco president da la Federaziun da ballape da Bahrain duai el plinavant avair arrestà e turmentà sportists, oravant tut giugaders da ballape. Schaic Salman dementescha questas rinfatschas.
Prinzi Ali bin al-Hussein
Il prinzi da 40 onns è president da la Federaziun da ballape da la Jordania ed anteriur commember executiv da la FIFA. Al-Hussein è stà il sulet cuntercandidat da Sepp Blatter tar las elecziuns da president il matg 2015. Suenter ch'el ha survegnì memia paucas vuschs en l’emprim scrutini ha el alura desistì dal segund scrutini uschia che Blatter ha gudagnà l’elecziun.
Jérôme Champagne
Il Franzos da 57 onns è stà durant passa 10 onns funcziunari da la FIFA, dal 2002 enfin il 2005 vice-secretari general. L’anteriur diplomat era vegnì numnà sco schef dal protocol dal comité d’organisaziun dal campiunadi mundial il 1998 en Frantscha. Schef dal OK era Michel Platini. Suenter l’elecziun da Sepp Blatter sco schef da la FIFA ha il Vallesan elegì Champagne sco cussegliader per las fatschentas internaziunalas. Il 2010 ha el bandunà la FIFA. Champagne ha gia vulì candidar per il post da president avant in onn, ha lura dentant stuì ceder ord mancanza da sustegn da las Federaziuns naziunalas.
Tokyo Sexwale
Il Sidafrican da 62 onns è politicher ed um da fatschenta. Sexwale è er stà arrestà durant 13 onns sin Robben Island ensemen cun Nelson Mandela ch’ha survegnì il Premi Nobel da la pasch. Il 1990 èn omadus vegnids libers. Il 2010 è el stà commember dal comité d’organisaziun dal campiunadi mundial en l’Africa dal Sid. Il mument maina Sexwale ina cumissiun d’observaziun da la FIFA per l’Israel e la Palestina.
Novas refurmas tar la FIFA
Al congress da la FIFA vegn sper l’elecziun dal nov president er decidì davart las novas refurmas. Suenter tut ils scandals vul la FIFA s’orientar da nov ed ha perquai mess sin maisa in entir pachet da refurmas. Las 207 Federaziuns naziunalas voteschan davart 9 puncts. Per dir gea a las novas refurmas dovri 155 vuschs:
Impurtants puncts:
- Temp d’uffizi per il president limità sin 12 onns.
- Ils salaris dals impurtants funcziunaris da la FIFA vegnan publitgads en l’avegnir.
- Il nov president ha dapli caracter represchentativ. El represchenta la FIFA anoravers.
- Il comité executiv da 26 persunas vegn remplazzà entras il council cun nov 36 persunas. Quest council è suttamessa a la direcziun strategica da la FIFA.
- In cussegl da la FIFA cun 36 persunas ord 6 Confederaziuns controllescha tut sco in cussegl d’administraziun.
- En ils gremis da direcziun duai vegnir manar en ina quota da dunnas.
- In management cun in CEO e 9 commembers maina las fatschentas.
- Tut ils commembers dal comité da la FIA duain laschar far in check d’integraziun.
Per blers experts da la FIFA fissi ina catastrofa per la FIFA ed il ballape sche las refurmas vegnissan refusadas. Las autoritads americanas pudessan alura classifitgar la FIFA sco in’organisaziun criminala e far uschè fitg squitsch enfin che la Federaziun internaziunala da ballape fiss inabel d’agir.