Siglir tar il cuntegn
Inhalt

Exteriur 5 morts pervi da chasas sballunadas a Marseille

Dus dis suenter che pliras chasas èn sballunadas a Marseille han forzas da salvament chattà 5 baras. Quai ha rapportà l'agentura da novitads franzosa, AFP sa referind sin la procura publica.

Purtret da las ruinas a Marseille.
Legenda: Duas chasas èn sballunadas a Marseille. Keystone

Mardi han ins discurrì anc da 2 dunnas e dus umens morts. Glindesdi èn las chasas sballunadas en il center da Marseille. Las autoritads avevan supponì che 5 fin 8 persunas sa chattian sut las ruinas. Ina chasa era vida, perquai ch'ella era decadenta. L'autra chasa era abitada.

Ulteriura paraid crudada sin las ruinas

Sco quai che pliras medias rapportan, han las forzas da salvament destruì glindesdi saira in'ulteriura chasa che smanatschava da sballunar. Ils pumpiers eran sa decidids da duvrar in chavaterra. Ina da las paraids da la terza chasa è lura crudada sin las ruinas da tschellas duas. Quai haja sminuì las schanzas da surviver per ils sparids.

Las forzas da segirezza tschertgian cun tutta forza suenter survivents pussaivels. En acziun èn stads passa 100 pumpiers. La tschertga pudess anc cuzzar plirs dis. La polizia investighescha en chaussa.

RR novitads 12:00