Siglir tar il cuntegn

Header

cuntegn

Exteriur 5 morts suenter ferm terratrembel en il Chile

Avant la costa dal Chile ha la terra stremblì la mesemna saira (temp local) cun ina fermezza da 8,4. Las autoritads han sinaquai dà ora in avertiment da Tsunami per l’entira regiun dal Pacific. L'avertiment è entant per part puspè abolì. Almain 5 persunas èn mortas.

L’observatori da terratrembels dals Stadis Unids ha rapportà ch’il terratrembel saja stà 55 kilometers avant la costa sin l’autezza da la citads Illapel, stgars 280 en il nord da la chapitala Santiagg de Chile. Pli tard haja quai dà ulteriuras stremblidas cun ina fermezza da 7,6.

Livel da l'aua crescha per bunamian 5 meters

Las pli autas undas sajan vegnidas mesiradas a Coquimbo en il Chile. Là haja l'aua cuntanschì in livel da 4.75 meters sur il livel normal. En autras citads da la costa saja l'aua creschida per fin 1,3 meters ed en il pajais vischin Peru per intgins centimeters, uschia las autoritads chilenas.

Donns ed almain 5 morts

Blers bajetgs sajan vegnids donnegiads, il provediment electric saja per part interrut, communitgescha il ministeri da l’intern. Per l’engira regiun da la costa saja vegnì ordinà evacuaziuns. Las autoritads han fin qua confermà 5 morts.

En il Chile scurlatta la terra adina puspè. Il 1939 eran mortas 28’000 persunas tar in terratrembel da la fermezza 7,8. Tar il pli ferm terratrembel (9,5) ch’è insumma ina giada vegnì registrà eran mortas 1’655 persunas il 1960.

RR novitads 06:00

Artitgels legids il pli savens