Siglir tar il cuntegn

Header

Navigaziun

Purtret d'ina miniera.
Legenda: Purtret d'archiv d'ina miniera da jade. Keystone
cuntegn

Exteriur 54 sparids suenter sbuvaditsch a Myanmar

En ina miniera da jade en il nord dal Myanmar èn almain 3 persunas mortas, 54 ulteriuras èn sparidas. Raschun è in sbuvaditsch en la miniera.

Il sbuvaditsch en la miniera ha sutterrà persunas e maschinas, ha communitgà il ministeri d'infurmaziun dal pajais en il sidost da l'Asia. La tschertga per ils lavurers anc sparids ha cumenzà. Ils emprims trais morts ch'ins haja chattà laschan dentant sbassar la speranza dad anc chattar survivents sut las tonnas da lozza e crappa.

Passa 100 morts il 2018

En las minieras da jade strusch controlladas en il Myanmar datti adina puspè sbuvaditschs mortals. Interpresas vulan cuvrir la dumonda per il crap verd, nà da la China. Qua pretendan els dals lavurers da lavurar svelt e senza pigliar resguard sin l'ambient u ristgs da sanadad. Il 2018 èn passa 100 persunas mortas en las minieras.

Ina fatschenta illegala da milliardas

Global Witness, ina gruppa da protecziun per l'ambient han schazegià la producziun da jade dal Myanmar per l'onn 2014 sin 31 milliardas dollars. Cifras pli actualas na datti betg. La gronda part da la crappa vegn importada illegalmain en la China. Ils interprendiders che stattan en stretg contact cun il militar pon uschia salvar la gronda part dal gudogn senza stuair pajar taglia.

Il Myanmar è stà onns a la lunga ina dictatura militara. Entant regia la purtadra dal Premi Nobel per la pasch Aung San Suu Kyi il pajais. En la regenza occupa il militar pliras posiziuns da clav.

RR novitads 16:00