Siglir tar il cuntegn
cuntegn

Exteriur 57 stadis fundeschan Banca d’infrastructura

A Peking han 57 stadis signà en il rom d'ina ceremonia l'acta da fundaziun per la realisaziun da la nova Banca asiatica d'investiziun en l'infrastructura.

delegads dals stadis a la ceremonia da fundaziun da la nova banca
Legenda: 57 stadis han signà en il rom d'ina ceremonia l'acta da fundaziun da la banca nova. Keystone

La banca internaziunala sut la direcziun da la China ha in chapital da fundaziun da 100 milliardas dollars. Ella duai curclar il basegn creschent da finanziaziuns per projects d'infrastructura en l'Asia.

La Svizra sa participescha cun 660 milliuns francs a la Banca d’infrastructura. Ils gronds stadis finanziaders èn la China, l'India e la Russia. Ils Stadis Unids ed il Giapun na sa participeschan betg.

Critichers vesan la banca sco concurrenta da la Banca mundiala u da la Banca asiatica da svilup. Or da vista dals stadis commembers duai la nova banca dentant plitost esser cumplementara ad auters organs da finanzas e lavurar tenor auts criteris internaziunals.

RR novitads 8:00